Ҳа демай мактаб ўқувчилари учун янги ўқув йили ҳам бошланади. Ўқув йили яқинлашиши билан аксарият оилаларни бир муаммо қийнайди. Яъни фарзандлари учун мактаб формалари ва ўқув қуроллари сотиб олиш. Бу муаммо, айниқса, эҳтиёжманд, кам таъминланган оилалар учун жуда сезилади.

Ўзбекистон мусулмонлари идораси ҳузуридаги «Вақф» хайрия жамоат фондининг Самарқанд вилояти филиали «Меҳр-2020» фонди жамоаси билан ҳамкорликда бундай эҳтиёжманд оилалар учун ажойиб совға ҳозирлашди. Янги ўқув йили олдидан вилоятнинг шаҳар ва туманларида истиқомат қилаётган, боқувчисини йўқотган оилаларнинг 1000 нафардан ортиқ фарзандларини ўқув қуроллари, мактаб формалари билан таъминлаш учун хайрия акциясини бошлаб юборишди. Бунда саховатпеша ҳомийларимиз томонидан дастлабки босқичда Нуробод туманида истиқомат қилиб келаётган 40 нафар болажонга мактаб формалари ва ўқув қуроллари сотиб олиниб, хайрия қилинди.

Зеро, Пайғамбар соллаллоҳу алайҳи васаллам етимни кафилликка олган кишига жаннатда ўзлари билан бирга бўлишини башорат бериб, кўрсаткич ва ўрта бармоқлари билан ишора қилганча шундай деганлар: “Мен билан етимни кафилликка олган киши жаннатда мана шундай ёнма-ён бўламиз”.