Хайрия хафталигининг иккинчи кунида амалга оширилган тадбирлар.

Ижтимоий кўмакка муҳтожлар ҳолидан хабар олиш, уларга саховат кўрсатиш халқимизга хос қадриятлардан ҳисобланади. Пандемия даврида юртдошларимиз бир-бирини қўллаб-қувватлаб, савобли ишларни амалга оширгани буни яққол кўрсатиб турибди.
“Вақф” хайрия жамоат фонди томонидан хайрия хафталигининг 2 кунида қуйидаги савобли ва хайрли ишлар амалга оширилди. Жумладан:
- юртимиздаги 176 та зиёратгоҳда Қуръон оятлари тиловат қилиниб, инсоният бошига келган бу хасталик ва синовларни даф бўлишини сўраб дуолар қилинди, қурбонликлар сўйилди.
- 25 та “Мехрибонлик”, “Мурувват” ва “Саҳоват” уйларида хайрия дастурхони тузалиб, ош тарқатилди. Ушбу ижтимоий муассасаларида яшовчиларни холидан хабар олиниб, уларга фойдаланиш учун хар хил турдаги 123 дона маиший техникалар тақдим қилинди.
- асосий эътибор ногиронлиги бор ва имконияти чекланган шахслар, ёлғиз кексалар, боқувчисини йўқотган ҳамда ижтимоий ҳимояга муҳтож оилаларга ғамхўрлик кўрсатиш, меҳр-оқибат, бағрикенглик муносабатларини янада ривожлантиришга қаратилди. 19553 нафар ижтимоий ҳимояга муҳтож оилаларга 11 турдаги (жами 32 кг) озиқ-овқат маҳсулотлари тарқатилди.
Хайру-эҳсон ва яхшилик улашиш ила Аллоҳнинг рахматидан умидвор бўлган саховатли инсонлар ва барча мўмин-мусулмонларни эзгу ишларда ҳомийлик ва хамкорлик қилишга чорлаб қоламиз. Зеро, Ҳадиси шарифда
«Аллоҳ таолога фарзлардан кейинги энг севимли амал мусулмоннинг қалбига хурсандлик киргизишдир», дейилган.

“Вақф” хайрия жамоат фонди матбуот хизмати