Joriy yilning 21 avgust kuni O‘zbekiston musulmonlari idorasi raisi, muftiy Shayx Nuriddin Xoliqnazar hazratlari raisligida “Vaqf” xayriya jamoat fondi Vasiylik kengashining navbatdagi yig‘ilishi bo‘lib o‘tdi. Unda fondning joriy yilning shu davrigacha bo‘lgan ish faoliyati, xayriya ishlari ko‘lami va kelgusidagi istiqbolli dasturlari ko‘rib chiqildi.

Yig‘ilishda so‘zga chiqqan notiqlar fond tomonidan kam ta’minlanganlarni qo‘llab-quvvatlash borasida amalga oshirilgan salmoqli ishlarni yuqori baholashdi. “Vaqf” fondi tomonidan amalga oshirilgan xayriya ishlari o‘tgan yilning shu davriga nisbatan sezilarli oshgani qayd etilib, uyga muhtoj 43 ta oilaga homiylar ko‘magida to‘liq jihozlangan uy qurib berilgani, jarrohlik amaliyoti, davolanish va nogironligi bo‘lgan fuqarolar sog‘liklarini tiklash uchun 1200 nafar fuqaroga moddiy yordam ko‘rsatilgani ijobiy natija sifatida baholandi. Shuningdek, yordamga muhtoj oila farzandlariga o‘quv qurollari tarqatilgani va chekka hududlarda quduq qazib, suv chiqarish ishlari amalga oshirilgani hamda o‘quv markazlari, tibbiyot muassasalari va xorijiy hamkorlar bilan aloqalar ham e’tirof etildi.

Shundan so‘ng fond oldida turgan muhim vazifalar, jumladan “Vaqf” mulklarini shakllantirish va yangilarini xarid qilish, fond markaziy apparati va hududiy filiallar shtat jadvallarini qayta shakllantirish, fondning xalqaro aloqalarini rivojlantirish kabi masalalar muhokama qilindi. Vasiylik kengashi a’zolari kun tartibidagi masalalar yuzasidan o‘z fikrlari va takliflarini bildirib o‘tishdi.

“Vaqf” xayriya jamoat fondi mulklarini shakllantirish, ularni ko‘paytirish bu sohada amalga oshirilayotgan xayriya ishlari salmog‘ining oshishiga xizmat qilishi qayd etilib, zarur hollarda chet eldagi vaqf mulklarini o‘rganish, xorijdagi vaqf fondlari bilan hamkorlik qilish kerakligi aytib o‘tildi.

Muftiy hazratlari fondning kelgusi faoliyatida har doimgidek ijtimoiy himoyaga muhtoj bo‘lgan aholi qatlamini qo‘llab-quvvatlashni yanada kengaytirish, o‘quv yurtlarida o‘qiyotganlarning to‘lovlarini qoplash va mehr-muruvvat tadbirlari salmog‘ini oshirish lozimligini ta’kidlab o‘tdi.

Shuningdek, fond faoliyatini ommalashtirish, ko‘chmas mol-mulklardan samarali foydalanish, xorijiy ilg‘or tajribalarni o‘rganish va mablag‘lar aylanmasida shaffoflikni ta’minlash kabilarga urg‘u qaratildi.

Yig‘ilishda tegishli qarorlar qabul qilindi.